SHBA – Trump vendos tarifa deri në 200% për barnat gjenerike të importuara

UASHINGTON, 22 korrik /ATSH-DPA/- Presidenti amerikan, Donald Trump, njoftoi se do të vendosë tarifa ndaj barnave gjenerike të importuara duke filluar nga mesi i vitit 2028, në një përpjekje për të detyruar kompanitë farmaceutike ta zhvendosin prodhimin në Shtetet e Bashkuara.

Në një postim në platformën e tij Truth Social, presidenti Trump bëri të ditur se barnat gjenerike do të përjashtohen nga tarifat deri në gusht të vitit 2028.

Më pas, për një vit do të aplikohet një tarifë prej 100%, e cila më pas do të rritet në 200%.

Sipas tij, periudha dyvjeçare e tranzicionit do t’u japë kompanive farmaceutike kohë të mjaftueshme për të ndërtuar ose zhvendosur kapacitetet prodhuese në SHBA.

Presideti Trump paralajmëroi gjithashtu se kompanitë që nuk do të investojnë në prodhim brenda territorit amerikan do të përballen me penalitete, megjithëse nuk dha detaje mbi natyrën e tyre dhe as bazën ligjore mbi të cilën do të vendosen tarifat.

Njoftimi rrit presionin ndaj prodhuesve të barnave që i prodhojnë ilaçet jashtë Shteteve të Bashkuara të Bashkuara.

Më herët këtë vit, presidenti Trump kishte shpallur planin për vendosjen e një tarife 100% edhe për barnat origjinale me patentë, me zbatim gradual duke nisur nga fundi i korrikut.

Këto masa përfshijnë disa përjashtime, si për produktet e mbuluara nga marrëveshje të caktuara tregtare ose për kompanitë që prodhojnë një pjesë të barnave edhe në SHBA.

Trump ka deklaruar se synon të ulë çmimet e larta të barnave me recetë në Shtetet e Bashkuara të Ameriikës, duke akuzuar kompanitë farmaceutike se përfitojnë nga kostot më të ulëta të prodhimit jashtë vendit për të siguruar avantazh ndaj prodhuesve amerikanë. /Ad.Ab./ a.jor.