SHBA – Ushtria amerikane shkatërron një anije të përdorur nga kartelet e drogës në Paqësorin Lindor

UASHINGTON, 29 gusht /ATSH-DPA/ – Ushtria amerikane tha se kishte shkatërruar një anije të përdorur nga kontrabandistët e drogës si stacion furnizimi me karburant në Paqësorin Lindor, pasi trupat amerikane larguan disa persona nga anija pa përdorur forcë.

Komanda Jugore e SHBA-së (SOUTHCOM), e cila mbikëqyr operacionet ushtarake në rajon, tha se anija ishte në ujëra ndërkombëtare dhe ishte përdorur nga “Los Choneros”, një nga bandat kriminale më të fuqishme të Ekuadorit.
“Personat e nxjerrë nga anija iu dorëzuan autoriteteve ekuadoriane”, tha ajo në X.

“Operacioni ishte koordinuar paraprakisht me qeverinë ekuadoriane”, tha SOUTHCOM.
Një video e publikuar nga komanda tregoi anijen duke shpërthyer.

“Ky ndalim ndërpret një nyje kritike në zinxhirin logjistik të trafikantëve,” tha SOUTHCOM.

Ushtria amerikane ka sulmuar vazhdimisht anije në Karaibe dhe në Paqësorin Lindor që nga vjeshta e kaluar me urdhër të presidentit Donald Trump, duke thënë se ato po përdoreshin për të kontrabanduar drogë në Shtetet e Bashkuara./