Shefi i shtabit të IDF merr përgjegjësinë për vdekjen e 3 pengjeve izraelite

Shefi i Shtabit të Forcave të Mbrojtjes të Izraelit, Herzi Halevi, ka marrë përgjegjësinë për vdekjen e tre pengjeve izraelitë të vrarë gabimisht nga ushtarët e IDF të premten.

Ai tha se IDF ka përfunduar një hetim paraprak të incidentit.

“IDF, dhe unë si komandant i saj, jemi përgjegjës për atë që ndodhi dhe ne do të bëjmë gjithçka për të parandaluar që incidente të tilla të përsëriten në luftimet e ardhshme,” tha Halevi në një deklaratë video, duke iu referuar si “një ngjarje e vështirë dhe e dhimbshme”. ”

“Nuk ka asgjë që ushtarët e IDF dhe komandantët e tyre në Rripin e Gazës duan më shumë se sa të shpëtojnë të gjallë pengjet. Në këtë rast, ne nuk patëm sukses. Ndjejmë pikëllimin e thellë të familjeve për vdekjen e pengjeve”, tha shefi i IDF.

“Një vendim në sekondë mund të jetë një vendim për jetë a vdekje. Mendoj se tre pengjet bënë gjithçka që ne të kuptonim – ata lëvizën pa këmishë që të mos dyshonim se mbanin eksploziv dhe mbanin një leckë të bardhë – por tensioni i kapërceu të gjitha sa më sipër”, tha Halevi.
Halevi tha se IDF ka përfunduar një hetim paraprak të incidentit dhe ka përditësuar familjet e pengjeve të vrarë mbi gjetjet e tyre.

“Ne njoftuam familjet për gjetjet e vështira dhe i publikuam në mënyrë transparente për publikun. Mund të ketë raste shtesë në të cilat pengjet arratisen ose braktisen gjatë luftimeve dhe ne kemi detyrën dhe përgjegjësinë t’i shpëtojmë ata të gjallë”, tha ai.

CNN ka kontaktuar me IDF për më shumë detaje.