Shqipëria mbylli tre kapituj e parë të negociatave me BE, Rama: Ditë e shënuar për Shqipërinë Europiane

Shqipëria ka shënuar një tjetër hap të rëndësishëm në procesin e integrimit europian, me mbylljen e tre kapitujve të negociatave gjatë Konferencës së IX Ndërqeveritare Shqipëri–Bashkimi Evropian, e zhvilluar në Bruksel më 14 korrik.

Përmes një postimi në rrjetet sociale, Rama ndau pamje nga konferenca, takimet zyrtare dhe delegacioni shqiptar që e shoqëroi në Bruksel, duke e përshkruar këtë si një tjetër ditë të shënuar për Shqipërinë europiane.

“Mirëmëngjes dhe me një tjetër ditë të shënuar të Shqipërisë Europiane, ju uroj një ditë të mbarë”, shkroi kryeministri.

Në fjalën e tij në Konferencën e IX Ndërqeveritare një ditë më parë, Rama theksoi se mbyllja e tre kapitujve dëshmon hyrjen në një “epokë të re” të marrëdhënieve mes Shqipërisë dhe Bashkimit Evropian, ku përparimi i vendit po shoqërohet me rezultate konkrete në tryezën e negociatave.

Nga ana e saj, Komisionerja e Bashkimit Evropian për Zgjerimin, Marta Kos, e ka cilësuar këtë si një moment të rëndësishëm për Shqipërinë.