Shuhet Birçe Hasko, ikona e kinemasë shqiptare!

Ka ndërruar jetë sot, 23 maj, aktori i njohur i kinematografisë shqiptare, Birçe Hasko, një prej emrave më të dashur dhe të vlerësuar të skenës dhe ekranit.

Lajmin e hidhur e bën të ditur aktori Mevlan Shanaj.

“Ka ikur Birçe Hasko. Ka ikur aktori që la pas një emër të nderuar, një emër të madh në kinematografinë shqiptare. Iku labi Birçe Hasko. Ka ikur njeriu që i dha emrin konkretësi mjeshtrisë së interpretimit. Ka ikur ai që humorin dhe rreptësinë i kishte pronë të karakterit. Lamtumirë mik bashkëpunëtor”, shkruan ai në rrjetet sociale.

---

Hasko njihej për interpretimet e tij të spikatura, ku solli me mjeshtëri karakterin “popullor” të jugut, duke e bërë atë të paharrueshëm për publikun shqiptar.

Ai lindi në Dukat të Vlorës më 15 mars 1942 dhe u formua fillimisht si mësues, përpara se të hynte në botën e artit. Më pas studioi për aktor në Institutin e Lartë të Arteve në Tiranë dhe u bë edhe pedagog, duke dhënë mësim për mjeshtërinë e aktorit dhe duke formuar breza të rinj artistësh.

Në karrierën e tij ka interpretuar dhjetëra role në film dhe teatër, duke u bërë i njohur për aftësinë e tij për të sjellë figura të jetës së përditshme shqiptare me shumë realizëm, humor dhe natyrshmëri. Ai ka luajtur në disa nga filmat më të njohur shqiptarë të periudhës 1970-1990 dhe më tej.

Shpesh konsiderohej një “mjeshtër i karaktereve”, sepse edhe në role dytësore arrinte të linte gjurmë të forta tek publiku.

Për kontributin e tij në art, është nderuar edhe me tituj artistikë shtetërorë dhe është vlerësuar si një nga figurat e rëndësishme të kinemasë shqiptare.

Lajmi në përditësim…

/tvklan.al