SIRI – Protesta kundër rritjes së çmimeve të karburanteve

DAMASK, 14 shtator /ATSH-DPA/- Qytetarë në disa provinca të Sirisë kanë protestuar për të dytën ditë radhazi kundër rritjes së çmimeve të karburanteve, duke bllokuar rrugët kryesore.

Protestat janë zhvilluar në Deir al-Zour, al-Hasakeh, al-Raqqa, Aleppo dhe Idlib.

Disa rrugë janë bllokuar me goma të djegura dhe gurë, ndërsa forcat e sigurisë kanë ndërhyrë për t’i hapur ato.

Ministria e Energjisë njoftoi një rritje prej 40% të çmimit të naftës dhe 28% të benzinës.

Autoritetet e justifikuan vendimin me rritjen e kostove në tregjet ndërkombëtare dhe problemet me furnizimin e brendshëm, për shkak të punimeve të mirëmbajtjes në rafinerinë e Banias.

Rritja pritet të ndikojë në më shumë se 100 produkte dhe në kostot e transportit.

Protestuesit kërkojnë që qeveria ta tërheqë vendimin, duke argumentuar se rritja e çmimeve po rëndon më tej jetesën e qytetarëve.

Sipas OKB-së, rreth 90% e popullsisë së Sirisë jeton nën kufirin e varfërisë.

Ministri i Energjisë, Mohammed al-Bashir tha se Siria prodhon aktualisht rreth 100 mijë fuçi naftë në ditë, ndërsa nevojat ditore janë rreth 300 mijë fuçi. /