Skema e mashtrimit nga call center në Tiranë, dëmi mbi 50 milionë euro

Autoritetet kanë zbuluar një skemë të organizuar mashtrimi që funksiononte nga tri call center në Tiranë, ku qytetarë evropianë josheshin përmes ofertave investimi të rreme. Hetimet e përbashkëta të autoriteteve austriane, shqiptare, Europol dhe Eurojust vlerësojnë se dëmi arrin të paktën 50 milionë euro, ndërsa deri tani janë rikuperuar rreth 900,000 euro.

Sipas TV Klan, rreth 150 persona në Austri kanë humbur së bashku rreth 26 milionë euro, ndërsa viktima të tjera janë identifikuar në Gjermani, Itali, Greqi, Spanjë, Britaninë e Madhe dhe Kanada. Hetimet tregojnë se anëtarët e grupit prodhonin foto dhe video të falsifikuara, duke përdorur imazhet e personazheve publikë si Presidenti Alexander Van der Bellen, ish-kancelari Karl Nehammer dhe futbollisti David Alaba, për të bindur njerëzit të investonin në projekte të rreme.

Skema kërkonte investime minimale prej rreth 250 eurosh, por disa viktima depozituan të gjitha kursimet, duke arritur humbje milionëshe. Operacioni policor në Tiranë zbuloi tre ambiente ku po punonin rreth 450 persona; në një nga pikat u gjetën 80 punonjës, ndërsa disa të tjerë arritën të iknin përmes daljeve të fshehta.

Hetimet vazhdojnë ndërsa autoritetet po përpiqen të ndjekin rrjedhën e parave dhe të rikuperojnë më shumë shuma të humbura; raportohet sërish TV Klan se priten zhvillime të mëtejshme dhe masa shtesë hetimore ndaj të përfshirëve.