Skema sociale në Kosovë: Mbi 41 milionë euro për shtesat e fëmijëve dhe pensionet bazike në shtator

Mbi 374 mijë fëmijë përfituan nga shtesat mujore, ndërsa 172,721 qytetarë morën pensione bazike të moshës. Për veteranët e luftës u ndanë mbi 7.8 milionë euro.

Agjencia e Statistikave të Kosovës ka publikuar të dhënat për skemat e mirëqenies sociale për muajin shtator 2026, duke paraqitur numrin e përfituesve dhe vlerën e mjeteve të shpenzuara për secilën kategori të skemave sociale dhe pensionale.

Sipas të dhënave të ASK-së, skema e shtesave për fëmijë kishte numrin më të madh të përfituesve, me gjithsej 374,652 fëmijë, për të cilët gjatë muajit shtator u ndanë 13 milionë e 537 mijë e 935 euro.

Ndërkaq, pensionet bazike të moshës përfshinë 172,721 përfitues, ndërsa vlera e pagesave arriti në 27 milionë e 614 mijë e 160 euro. Në kategorinë e pensioneve kontributpaguese të moshës ishin 47,738 përfitues, për të cilët u ndanë 11 milionë e 673 mijë e 749.40 euro. Për pensionet parciale kontributpaguese të moshës përfituan 11,493 persona, me pagesa në vlerë prej 2 milionë e 482 mijë e 402.24 eurosh.

Për pensionet e personave me aftësi të kufizuara u ndanë 3 milionë e 576 mijë e 450 euro për 21,644 përfitues. Ndërkaq, pensionet e familjeve të dëshmorëve dhe invalidëve të luftës përfshinë 12,332 përfitues, të cilët morën gjithsej 3 milionë e 753 mijë e 648.56 euro.

Sipas ASK-së, për veteranët e luftës u ndanë 7 milionë e 840 mijë e 105.60 euro, ndërsa numri i përfituesve në këtë kategori ishte 39,699. Nga skema e ndihmës sociale përfituan 14,664 persona, me pagesa në vlerë prej 2 milionë e 172 mijë e 544 eurosh.

Mbështetje financiare morën edhe 9,394 familje që kanë fëmijë me aftësi të kufizuara, për të cilat u ndanë 659,100 euro. Ndërkaq, nga skema e pensioneve paraplegjike dhe tetraplegjike përfituan 3,839 persona, ndërsa shuma e pagesave arriti në 1 milion e 521 mijë e 263 euro.

Në kategorinë e pensioneve familjare ishin 2,304 përfitues, me pagesa prej 350,700 eurosh, ndërsa nga skema e të vejave përfituan 1,925 persona, të cilëve iu ndanë 521,700 euro. Për pensionet e Forcës së Sigurisë së Kosovës u ndanë 504,900 euro për 993 përfitues, kurse pensionet e Trupave Mbrojtëse të Kosovës përfshinë 1,380 përfitues, me pagesa në vlerë prej 291,773 eurosh.

Pensionet e Trepçës u paguan për 728 përfitues, ndërsa vlera e mjeteve të ndara ishte 113,400 euro. Në të njëjtën periudhë, pensionet e invalidëve të punës përfshinë 24 persona, për të cilët u paguan 3,600 euro.

Të dhënat e ASK-së tregojnë se nga skema e kompensimit për punëtorët e arsimit për vitet 1990/91 deri në vitet 1998/99 përfituan 15,606 persona, ndërsa vlera e pagesave arriti në 1 milion e 362 mijë e 131 euro.

Për mbështetjen financiare të lehonave të punësuara u ndanë 1 milion e 89 mijë e 500 euro për 2,176 përfituese. Ndërsa lehonat e papunësuara përfituan gjithsej 3 milionë e 420 mijë euro, me 6,817 përfituese gjatë muajit shtator.

Sipas këtyre të dhënave, skemat e mirëqenies sociale në Kosovë përfshijnë pensionet e moshës dhe ato kontributpaguese, kategoritë e dala nga lufta, ndihmën sociale, mbështetjen për fëmijët dhe familjet me nevoja të veçanta, si dhe skemat e tjera për pensionistët dhe lehonat.