Arinjtë nëpër fshatrat e Gostivarit: shoqatat e gjuetarëve dalin në terren me pajisje për largim të sigurt

Para disa ditësh në Debresh të Gostivarit u vërejt një ari, duke shkaktuar shqetësim te banorët lokalë, siç njofton Tetova Expres duke iu referuar raportimit të Tv Koha. Xhirimet e kamerave të sigurisë tregojnë se ariu ka lëvizur nëpër vende të ndryshme të fshatit, ndër të cilat stadiumi dhe oborret e shtëpive private.

Reagimi i autoriteteve lokale të Debreshit ishte i menjëhershëm: përmes faqes në Facebook “Shoqata Debreshi” u bë thirrje për kujdes të shtuar, veçanërisht për prindërit dhe fëmijët që në orët e mëngjesit nisen për në shkollë — fëmijët të mos lëvizin vetëm, sidomos në rrugët pranë pyjeve dhe zonave të pabanuara, dhe nëse haset një ari, të mos i afrohen, të mos e provokojnë dhe të njoftojnë institucionet përkatëse.

Rasti i Debreshit, por kohë më parë edhe ai në Dobërdoll të Gostivarit, ka vënë në lëvizje shoqatat: Shoqata e Gjuetarëve “Dreni” – Debresh nënshkroi marrëveshje bashkëpunimi me Shoqatën Ekologjike Maqedonase, me qëllim ndërmarrjen e masave të përbashkëta për menaxhimin e pranisë së ariut pranë zonave të banuara.

Menjëherë pas nënshkrimit u realizua një vizitë e përbashkët në terren, ku u vlerësua situata dhe u shqyrtuan masat parandaluese. Në kuadër të bashkëpunimit, Shoqatës “Dreni” iu dhurua një pajisje e specializuar për largimin e sigurt të ariut nga vendbanimet, me qëllim mbrojtjen e banorëve dhe parandalimin e incidenteve të mundshme.