SOFJE – Kos: Ballkanin Perëndimor e shoh si pjesë të Bashkimit Evropian

Duke folur në mbërritje të Konferencës Ndërkombëtare Ministrore për Korridorin VIII në Sofje, Kos theksoi rëndësinë e lidhjeve më të mira të transportit për të ardhmen e rajonit.

Ajo e cilësoi Bullgarinë si një portë drejt Evropës për rajonin e Detit të Zi dhe Turqinë, ndërsa nënvizoi rolin e rëndësishëm të Ballkanit Perëndimor në rritjen e ndërlidhjes rajonale.

Sipas Kos, në rajon janë duke u zhvilluar më shumë se 130 projekte, që përfshijnë ndërtimin e rrugëve dhe hekurudhave të reja, si dhe përmirësimin e pikave kufitare.

Megjithatë, komisionerja evropiane tha se vizioni për zgjerimin e BE-së shkon përtej zhvillimit të infrastrukturës. Sipas saj, objektivi përfundimtar është integrimi i të gjithë Ballkanit Perëndimor në Bashkimin Evropian.

Në këtë skenar, pikat kufitare dhe lidhjet e transportit do të merrnin një rëndësi tjetër, pasi vendet e rajonit do të bëheshin pjesë e një Evrope më të integruar.

Kos theksoi se realizimi i këtij vizioni kërkon përpjekje të përbashkëta nga institucionet e BE-së, shtetet anëtare dhe vendet e Ballkanit Perëndimor.

Korridori VIII lidh detin Adriatik me Detin e Zi përmes Shqipërisë, Maqedonisë së Veriut dhe Bullgarisë, duke përfshirë infrastrukturë rrugore dhe hekurudhore.

Një nga pjesët kryesore të papërfunduara mbetet lidhja hekurudhore mes Bullgarisë dhe Maqedonisë së Veriut.

Në nëntor të vitit 2025, Sofja dhe Shkupi nënshkruan një marrëveshje për ndërtimin e një tuneli hekurudhor ndërkufitar.

Në anën bullgare, rreth 2,4 kilometra hekurudhë mes Gyueshevos dhe kufirit ende nuk janë ndërtuar.

Korridori VIII konsiderohet gjithashtu i rëndësishëm për sigurinë rajonale dhe mobilitetin ushtarak, pasi krijon një lidhje strategjike mes Detit të Zi dhe Adriatikut./ a.jor.