Sot, Dita Ndërkombëtare e Rinisë

Dita Ndërkombëtare e Rinisë është një ditë që i kushtohet rolit, potencialit dhe kontributit të të rinjve në ndërtimin e një të ardhmeje më të drejtë dhe të qëndrueshme.

Tema e këtij viti, “Kontekste të ndryshme, aspirata të përbashkëta” (Different Contexts, Common Aspirations), vë në pah faktin se, pavarësisht dallimeve mes vendeve dhe komuniteteve ku jetojnë, të rinjtë në mbarë botën ndajnë shumë prej të njëjtave synime. Ata kërkojnë dinjitet, mundësi të barabarta, arsim cilësor, punë të denjë, pjesëmarrje kuptimplotë në shoqëri dhe një të ardhme të qëndrueshme.

Dita Ndërkombëtare e Rinisë shërben gjithashtu si një thirrje për institucionet, organizatat dhe shoqërinë që të krijojnë më shumë hapësira për përfshirjen e të rinjve në vendimmarrje. Investimi në arsim, punësim, aftësi digjitale dhe pjesëmarrje qytetare mbetet thelbësor për t’u dhënë të rinjve mundësinë të shndërrojnë aspiratat e tyre në rezultate konkrete.

“Të rinjtë tashmë po udhëheqin si organizatorë dhe novatorë. Por, për të shkuar edhe më tej, ata kanë nevojë për qasje në aftësitë që do të formësojnë të ardhmen”, u shpreh sekretari i përgjithshëm i OKB-së, Antonio Guterres.

Sipas OKB-së, në botë ka rreth 1,3 miliardë të rinj të moshës 15 deri në 24 vjeç, duke e bërë këtë grupmoshën më të madhe të të rinjve të regjistruar deri më sot.

Deri në vitin 2050, 69% e të rinjve në botë do të jetojnë në vende me të ardhura të ulëta dhe të mesme të ulëta, krahasuar me 59% në vitin 2025.

Ndërmjet viteve 2025 dhe 2050, popullsia e të rinjve në vendet me të ardhura të larta dhe të mesme të larta parashikohet të ulet me rreth 24%.