SPAK kërkoi pushimin e çështjes, GJKKO rikthen dosjen e gjyqtares Irena Gjoka

Gjykata e Posaçme kundër Korrupsionit dhe Krimit të Organizuar (GJKKO) ka vendosur këtë të martë që të rikthejë në SPAK për plotësim hetimesh çështjen e gjyqtares Irena Gjoka.

Sjellim ndërmend se Prokuroria e Posaçme kishte kërkuar pushimin e çështjes, me argumentin se procesi është zhvilluar në mungesë dhe nuk është vërtetuar nëse gjyqtarja Gjoka ka qenë në dijeni të dënimit të saj në shtetin grek.

Hetimet ndaj gjyqtares së posaçme nisën pas denoncimit të bërë nga kreu i Partisë Demokratike, Sali Berisha, i cili në maj të vitit 2025 publikoi një vendim të gjykatës së Janinës që e kishte dënuar atë në fillim të viteve 2000. PD e kallëzoi gjyqtaren në SPAK për falsifikim të vulave dhe formularëve të dekriminalizimit.

Ndërkohë sjellim gjithashtu ndërmend se Gjoka ishte gjyqtarja e hetimit paraprak dhe ajo që lëshoi masat e sigurisë për dosjen “Partizani”, mes të cilave “Detyrim për t’u paraqitur” dhe më pas “Arrest shtëpie” për ish-kryeministrin Sali Berisha. Pas kësaj, Inspektori i Lartë i Drejtësisë regjistroi një hetim disiplinor ndaj gjyqtares.

/tvklan.al