SPANJË – Qindra të evakuar pas zjarreve të fuqishme në Andaluzi

MADRID, 10 gusht /ATSH-DPA/ – Një zjarr i fuqishëm pyjor në jugperëndim të Spanjës vazhdon të përhapet, ndërsa autoritetet rajonale paralajmërojnë për vështirësi të mëdha nën vënien nën kontroll të flakëve.

Zjarri ka përfshirë provincën e Huelvës që prej së enjtes dhe, sipas qeverisë rajonale të Andaluzisë, zona e prekur tashmë i kalon 20 mijë hektarët, ose rreth 200 kilometra katrorë.

Megjithatë, nuk dihet ende se sa nga kjo sipërfaqe është shkatërruar realisht nga flakët.

Ministri i Brendshëm i Andaluzisë, Antonio Sanz, tha se zjarri aktualisht është “përtej kapacitetit të shërbimeve zjarrfikëse për ta shuar”.

Ai theksoi se kjo nuk lidhet me mungesën e mjeteve apo personelit, por me sjelljen ekstreme dhe të paparashikueshme të flakëve.

“Prioriteti kryesor tani është mbrojtja e njerëzve”, deklaroi Sanz.

Deri tani, 479 persona janë evakuuar si masë parandaluese nga zonat e rrezikuara.

Rreth 600 zjarrfikës po luftojnë me flakët pranë qytetit të vogël Niebla, rreth 60 kilometra në perëndim të Seviljes.

Terreni kodrinor dhe pjesërisht i paarritshëm i pyjeve e vështirëson ndjeshëm ndërhyrjen e ekipeve në tokë.

Në operacion janë angazhuar gjithashtu më shumë se 20 avionë dhe helikopterë zjarrfikës.

Sipas shërbimit zjarrfikës, gjatë natës ekipet arritën të krijojnë disa vija të rëndësishme mbrojtëse përmes djegieve të kontrolluara dhe përdorimit të makinerive të rënda.