SRCE e Ponoš-it: Humbja e zërit proevropian në Kuvend do të ishte fundosje historike e Serbisë

Partia “Srbija centar” (Srce) e Zdravko Ponoš-it deklaroi sot se humbja e votës proevropiane në Kuvend mund të jetë një fundosje historike e vendit, dhe se lufta për standardet evropiane në institucione nuk duhet të ndalet.

“Nëse në përbërjen e re të Kuvendit Popullor nuk ka forca politike që haptazi, pa mëdyshje dhe pa kalkulime përkrahin anëtarësimin e plotë të Serbisë në BE, vendi ynë jo vetëm që do ta humbasë trenin aktual për Evropën — ai do t’i mbyllë ato dyer për një kohë të gjatë”, thuhet në deklaratën e partisë.

Srce vlerëson se Serbia ndodhet në udhëkryqin më të rëndësishëm historik të këtij shekulli dhe rrezikon të mbetet “vrimë e zezë në hartën e Evropës”, e izoluar dhe e lënë vetëm, ku sundojnë “interesat mafioze dhe presionet e forta politike e financiare të vendeve që duan ta mbajnë në periferi të Evropës”. Gjeneratat e reja, paralajmëron partia, do të vazhdojnë të largohen masivisht.

Mbijetesa e parlamentarizmit legjitim shumëpartiak dhe ekzistenca e një opsioni të fortë, të zëshëm dhe parimor prointegrues në Kuvend është garancia e vetme që proceset reformuese nuk mund të ndalen, theksoi Srce.

SRCE do të marrë pjesë në zgjedhjet e 25 tetorit me koalicionin “Evropska Srbija”, pas çarjes me dy anëtarë të Kryesisë që e kundërshtuan pjesëmarrjen në zgjedhje. Deklarata e sotme e partisë mbron pikërisht platformën pro-BE të koalicionit, duke theksuar se beteja për standardet evropiane duhet të vazhdojë brenda institucioneve.

Burimi: Danas