STRASBURG – Avokatja iraniane Nasrin Sotoudeh fiton çmimin “Havel” për të drejtat e njeriut

STRASBURG, 28 shtator /ATSH-AFP/ – Avokatja dhe aktivistja iraniane Nasrin Sotoudeh është shpallur sot fituese e Çmimit “Vaclav Havel” për të Drejtat e Njeriut, i cili jepet nga Këshilli i Evropës për mbrojtjen e të drejtave të njeriut.

Sotoudeh është e njohur për kundërshtimin e dënimit me vdekje dhe të detyrimit për mbajtjen e shamisë nga gratë në Iran.

Këshilli i Evropës vlerësoi se ajo ka mbrojtur avokatë, gazetarë, pjesëtarë të minoriteteve dhe fëmijë të rrezikuar nga ekzekutimi, pavarësisht arrestimeve të përsëritura, dënimeve të gjata me burg dhe rreziqeve personale.

Ajo është iraniania e parë që merr këtë çmim.

Në garën finale ishte edhe bashkëkombësja e saj Masih Alinejad, gazetare e mërguar në SHBA dhe aktiviste kundër detyrimit për mbajtjen e shamisë, si dhe hungarezja Marta Pardavi, bashkëdrejtuese e një organizate që mbron të drejtat e azilkërkuesve.

Në një mesazh video të dërguar nga Teherani, Sotoudeh, 63 vjeçe, tha se në momente të tilla njerëzit kujtojnë betejat e së kaluarës, idealet e përbashkëta dhe mbështetjen që marrin nga njerëzit në mbarë botën.

Ajo shprehu shpresën se një ditë “dielli i lirisë do të shkëlqejë edhe mbi vendin tonë”.

Çmimin në Strasburg e mori vajza e saj, Mehraveh Khandan Heris, pasi vetë Sotoudeh ndodhet në Iran.

Çmimi u krijua në vitin 2013 në nder të ish-disidentit çek Václav Havel dhe shoqërohet me një shpërblim prej 60 mijë eurosh.

Sotoudeh u arrestua nga autoritetet iraniane në prill dhe u lirua me kusht më shumë se një muaj më vonë.

Në atë kohë nuk u bënë publike detaje të plota mbi arsyet e arrestimit.

Ajo ka kaluar edhe më parë periudha të ndryshme në burg.

Këshilli i Evropës tha se arrestimi i saj ka ndodhur në një situatë shqetësimi për sigurinë e saj dhe për reprezaljet ndaj avokatëve të pavarur dhe mbrojtësve të të drejtave të njeriut në Iran.

Bashkëshorti i saj, Reza Khandan, ndodhet gjithashtu në burg që nga dhjetori 2024.

Sipas organizatave për mbrojtjen e të drejtave të njeriut, mijëra persona janë arrestuar në Iran që nga fillimi i ofensivës amerikano-izraelite kundër Republikës Islamike më 28 shkurt.

Autoritetet iraniane kanë deklaruar ndërkohë se mbi 3 mijë persona kanë humbur jetën gjatë protestave kundër qeverisë në janar, duke fajësuar për dhunën atë që e kanë përshkruar si akte terroriste të organizuara nga SHBA-ja dhe Izraeli./ /Ad.Ab./ a.jor.