Strukturat drejtuese të Partisë Demokratike/ Noka rikonfirmon postin, Bajaziti, Këlliçi dhe Kedhi nënkryetarët e rinj

Partia Demokratike ka përmbyllur procesin e zgjedhjes së strukturave të reja drejtuese, pas votimit të zhvilluar në Këshillin Kombëtar, i cili zgjati deri në orët e para të mëngjesit të sotëm (16 korrik). Në përfundim të procesit u zgjodhën tre nënkryetarët e rinj të partisë, Sekretariati i ri dhe Komisioni i Apelimit.

Flamur Noka është rikonfirmuar në postin e Sekretarit të Përgjithshëm, duke ruajtur një nga funksionet kryesore në drejtimin e Partisë Demokratike. Noka ishte në garë me Saimir Koreshin dhe fitoi postin e numrit dy të selisë blu me 184 vota, kundrejt 84 votave që mori rivali i tij.

Gjithashtu, për postin e nënkryetarit, me 193 vota janë zgjedhur Erisa Bajaziti, Belind Këlliçi dhe Nikola Kedhi. Për postin e Sekretarit Organizativ, Këshilli Kombëtar votoi Klevis Balliun, ndërsa Andi Mustafaj u zgjodh Sekretar për Burimet Njerëzore. Marash Logu do të mbajë postin e Sekretarit për Çështjet Ligjore, ndërsa Sekretariatin për Marrëdhëniet me Publikun do ta drejtojë Viola Kapedani.

Këshilli Kombëtar votoi gjithashtu emrat e rinj për Komisionin e Apelimit, Sekretariatin për Pushtetin Lokal, të Përndjekurit Politikë, Diasporën dhe të Drejtat e Njeriut, post ky që do të drejtohet nga Franc Nuri.

Në proces bie në sy përfaqësimi i të rinjve. Tre nënkryetarët e rinj janë nën moshën 35 vjeç, por pjesë e lidershipit të partisë, ndërsa 13 nga 15 anëtarët e zgjedhur në Sekretariatin e Partisë janë për herë të parë pjesë edhe e Kryesisë.

/RTSH/