Studentët reagojnë për shtrenjtimin e biletave, Janevska: Do të reagojmë sipas mundësive buxhetore

Studentët në Maqedoninë e Veriut po reagojnë ndaj shtrenjtimit të biletave të transportit ndërqytetës me autobus, duke paralajmëruar se kostot e udhëtimit po bëhen të papërballueshme për ta. Studentët që udhëtojnë për shembull në linjën Tetovë–Shkup e kthim, ose në të dyja drejtimet në linjën Kumanovë–Shkup, duhet të paguajnë rreth 6,000 denarë në muaj vetëm për transport.

Organizatat studentore kërkojnë që transporti me autobus të subvencionohet për studentët që studiojnë jashtë vendbanimit. Sipas tyre, shumë studentë varen nga transporti i përditshëm për të ndjekur leksionet dhe çmimet e larta po rrezikojnë vazhdimësinë e studimeve.

Në lidhje me kërkesat e studentëve, ministrja e Arsimit, Vesna Janevska, tha se deri tani nuk u ka mbërritur asnjë iniciativë nga studentët. Sipas saj, kur iniciativa të mbërrijë, ajo do të shqyrtohet dhe do të merret vendim brenda mundësive buxhetore.

Burimi: TV21