Studenti Petar Zhivkoviq denoncon: Policia serbe më ndjek me ‘metodën japoneze’, njoha shefin e UKP-së

Studenti serb Petar Zhivkoviq, aktivist dhe kandidat i listës “Studentska lista – Studenti pobeđuju”, ka denoncuar në një konferencë për shtyp se prej disa kohësh po ndiqet nga policia serbe. Siç njofton Nova.rs, ai pretendon se mes personave që e ndjekin ka njohur edhe shefin e Drejtorisë së Policisë Kriminale (UKP), Marko Kričak.

Zhivkoviq tregoi se që nga 25 shtatori kishte vënë re të njëjtin person në tri vende të ndryshme në Beogradin e Ri. Më vonë, tha ai, u shfaq një makinë “Škoda” që e ndiqte, dhe një mbrëmje, teksa ishte bashkë me babanë e tij, gjeneralin e policisë në pension Bogoljub Živković, panë sërish të njëjtin person.

Ai shtoi se makina e tij u tërhoq nga “merimanga” e Parking Servisit pa iu dhënë asnjë informacion se kur ishte marrë, gjë që e shtyu të dyshojë se në të mund t’i ishte vendosur ndonjë pajisje GPS apo përgjimi. Sipas Nova.rs, natën mes 3 dhe 4 tetorit, para pallatit të tij, ai pa disa makina luksoze dhe rreth dhjetë persona, mes të cilëve njohu Kričakun dhe persona që beson se i përkasin UKP-së.

Ish-inspektori i Ministrisë së Brendshme, Milan Dumanović, me shtatë vjet përvojë në repartin e ndjekjes, e quajti këtë praktikë “metodë japoneze të ndjekjes” në emisionin “Probudi se” të TV Nova, transmeton Nova.rs. Ndryshe nga ndjekja klasike sekrete, ku qëllimi është mbledhja e informacionit pa dijeninë e objektivit, këtu vetë prania e operativëve, thotë ai, është “arma” dhe shërben për frikësim.

Dumanović shtoi se dalja në terren e vetë shefit të UKP-së për ndjekjen e një 23-vjeçari tregon frikën e pushtetit, dhe theksoi se ndjekja ligjërisht mund të bëhet vetëm me urdhër të gjykatës.