Trump njofton kantierin e ri detar 6.6 miliardë dollarësh

Presidenti i SHBA-së, Donald Trump, njoftoi të martën nisjen e ndërtimit të një kantieri të ri detar në Sparrows Point, Maryland, me një investim fillestar prej 3.7 miliardë dollarësh nga kompania e teknologjisë së mbrojtjes Anduril dhe 2.9 miliardë dollarë nga Marina Amerikane.

Sipas Trump, bëhet fjalë për kantierin e ri detar më të madh në Shtetet e Bashkuara që nga Lufta e Dytë Botërore. Objekti, i pagëzuar “Arsenal-2”, do të ndërtohet në zonën e Sparrows Point dhe synon të prodhojë gjeneratën e ardhshme të mjeteve detare amerikane.

Trump tha se në kantier do të ndërtohen nëndetëse autonome, tuba silurësh dhe komponentë për nëndetëset sulmuese të klasit Virginia.

Sipas presidentit amerikan, Marina do të kontribuojë me 2.9 miliardë dollarë për projektin, ndërsa mund të ketë deri në 21 miliardë dollarë në blerje të ardhshme.

Trump deklaroi gjithashtu se taksapaguesit amerikanë do të zotërojnë 40% të aksioneve në kantierin e ri detar.

Gjatë ceremonisë, presidenti njoftoi edhe një rritje të mundshme të buxhetit amerikan të mbrojtjes në 1.5 trilion dollarë këtë vit, duke thënë se Shtetet e Bashkuara kanë kaluar tashmë pragun e një trilion dollarëve në shpenzimet e mbrojtjes.

Projekti pritet të shërbejë si një investim i rëndësishëm në kapacitetet industriale dhe teknologjinë detare të SHBA-së, si dhe në prodhimin e mjeteve të reja ushtarake.