Sulm me dronë ukrainas në Tatarstan të Rusisë, 13 të vrarë dhe 75 të plagosur

Të paktën 13 persona janë vrarë në një sulm me dronë ukrainas në republikën ruse të Tatarstanit, thanë zyrtarët.

Mes viktimave ishte edhe një fëmijë, ndërsa 75 persona të tjerë u plagosën, sipas autoriteteve ruse. Ky konsiderohet një nga sulmet më vdekjeprurëse ndaj Rusisë që nga fillimi i pushtimit në shkallë të plotë të Ukrainës nga Moska.

Dronët goditën Nizhnekamskun, më shumë se 1 100 kilometra larg kufirit me Ukrainën.

Forcat e Armatosura të Ukrainës konfirmuan se ishte goditur rafineria e naftës Tanevo në Nizhnekamsk, ndërsa prodhuesi ukrainas i teknologjisë së mbrojtjes, FirePoint, tha se në sulm ishin përdorur dronët e tij FP-1.

Sulmi zgjati disa orë gjatë natës dhe deri në mëngjes, sipas burimeve lokale. Objektet e rafinerisë së naftës në Nizhnekamsk ishin goditur edhe më 12 qershor.

Pamjet e verifikuara në rrjetet sociale tregojnë re të mëdha tymi dhe flakë që ngrihen në qiell gjatë ditës, ndërsa në sfond dëgjohen sirenat e alarmit për sulme ajrore.

Kievi kohët e fundit ka shtuar sulmet ndaj objekteve që, sipas tij, kontribuojnë në të ardhurat dhe logjistikën e luftës së Rusisë në Ukrainë.

“Objektet që Ukraina ka vënë në shënjestër përdoren për të kryer sulme kundër Ukrainës, për të prodhuar armë dhe për të mbështetur përpjekjet luftarake të Rusisë”, tha Andriy Kovalenko, kreu i Qendrës së Ukrainës për Kundërvënien ndaj Dezinformimit.

Moska konfirmoi se objektet industriale ishin në shënjestër, por tha se u goditën edhe zona të tjera të banuara.

“Persona civilë që nuk ishin të përfshirë në asnjë operacion ushtarak ndodheshin aty”, tha Komiteti Hetimor i Rusisë.

Moska tha se më shumë se 450 dronë ukrainas u rrëzuan nga mbrojtja ajrore ruse gjatë natës.

Kievi është bërë gjithnjë e më i suksesshëm në kryerjen e sulmeve me rreze të gjatë brenda territorit rus, duke synuar shpesh depot ose infrastrukturën energjetike, ndërsa numri i viktimave civile është në rritje.

Ndërkohë, Rusia vazhdon të godasë Ukrainën me sulme të rregullta ajrore në shkallë të gjerë, duke shënjestruar qytete dhe zona të banuara. Javën e kaluar, një sulm i kombinuar me dronë dhe raketa në Kiev vrau 21 persona.

Ndërsa në Kharkiv, pranë vijës së frontit, pesë persona u vranë gjatë natës në një sulm me artileri ruse.