Sulmi rus me bomba të drejtuara godet ndërtesën e banimit në Sumy: 2 të vrarë e 7 të plagosur, mes tyre një 13-vjeçare

Një bombë ajrore e drejtuar ruse goditi një ndërtesë banimi shumëkatëshe në qytetin e Sumy-t mbrëmjen e së premtes, duke vrarë dy persona dhe plagosur shtatë të tjerë, njoftoi guvernatori i rajonit Oleh Hryhorov.

Sipas presidentit Volodymyr Zelensky, bomba goditi ndërtesën drejtpërdrejt, mes katit të tretë dhe të katërt. Mes të plagosurve është edhe një vajzë 13-vjeçare; tre prej tyre ndodhen në gjendje të rëndë dhe po marrin trajtim mjekësor.

Katër persona, përfshirë një fëmijë, janë shpëtuar nga rrënojat, bëri të ditur Zelensky, i cili paralajmëroi se mund të ketë ende njerëz të bllokuar. Ekipet e emergjencës vijojnë operacionet e kërkim-shpëtimit dhe po përpiqen të shuajnë zjarret.

Më herët, guvernatori Hryhorov kishte raportuar se forcat ruse sulmuan Sumy-n dhe rrethinat e tij me bomba ajrore të drejtuara, njëra prej të cilave goditi ndërtesën shumëkatëshe të banimit.

Zelensky njoftoi gjithashtu se Rusia goditi të njëjtën mbrëmje një klinikë mjekësore në Pavlohrad dhe infrastrukturë logjistike në rajonin e Kievit.

Në reagimin e tij ndaj sulmeve, Zelensky përsëriti thirrjen për presion të shtuar ndaj Moskës dhe u bëri thirrje Shteteve të Bashkuara të miratojnë ligjin që ashpërson sanksionet ndaj Rusisë. Ligji “Sanctioning Russia and Iran Act” i senatorit Lindsey Graham u miratua nga Dhoma e Përfaqësuesve më 16 shtator dhe i jep presidentit amerikan autoritetin të vendosë tarifa deri në 100% ndaj vendeve që blejnë energji ruse. “Tani, Amerika ka shansin t’i dërgojë agresorit sinjalin e duhur se do të ketë presion të drejtë dhe se lufta duhet të mbarojë,” tha Zelensky.

Burimi: The Kyiv Independent