Të shtëna me armë në rrugën e Patokut, arrestohen tre persona dhe shpallet në kërkim një tjetër

Një konflikt mes të afërmish ka përfunduar me të shtëna me armë zjarri në drejtim të një automjeti, në rrugën e Patokut. Ngjarja u regjistrua mesditën e djeshme, ndërsa fatmirësisht nuk pati persona të lënduar.

Policia ka arrestuar tre persona, familjarë me njëri-tjetrin, të dyshuar për përfshirjen në ngjarje. Në pranga kanë rënë Gj. L., 67 vjeç, djali i tij Gj.(A.) L., 40 vjeç, si dhe E. L., 28 vjeç, kushëri i tyre. Të tre janë banues në Laç.

Ndërkohë, është shpallur në kërkim V. Gj.(L.), 35 vjeç, djali tjetër i 67-vjeçarit.

Sipas hetimeve paraprake, gjithçka ka nisur pas një konflikti verbal mes të afërmve. Për motive të dobëta, të dyshuarit dyshohet se kanë qëlluar me armë zjarri në drejtim të automjetit me të cilin udhëtonte kushëriri i tyre, shtetasi P. L., 38 vjeç.

Në përpjekje për t’u larguar nga vendi i ngjarjes, 38-vjeçari ka përplasur automjetin që drejtonte me një tjetër mjet, duke shkaktuar vetëm dëme materiale. Automjeti i tij është sekuestruar nga policia si provë materiale.

Uniformat blu vijojnë kërkimet për kapjen e 35-vjeçarit të shpallur në kërkim, ndërsa po punohet edhe për gjetjen e armës së zjarrit të përdorur në ngjarje.

Materialet procedurale janë referuar në Prokurorinë e Lezhës, e cila do të vijojë hetimet për përcaktimin e përgjegjësisë penale të secilit prej personave të përfshirë.