Tensionet me Teheranin, Trump: SHBA nuk do ta sulmojë Iranin para zgjedhjeve të nëntorit

Presidenti i SHBA-së, Donald Trump, tha të enjten se Shtetet e Bashkuara po zhvillojnë diskutime produktive me Iranin dhe nuk do të nisin një sulm ndaj vendit para zgjedhjeve të mesit të mandatit për në Kongres në nëntor.

“Po zhvillojmë diskutime produktive me Republikën Islamike të Iranit”, shkroi Trump në një postim në Truth Social.

Ai tha se bllokada amerikane ndaj porteve iraniane mbetet në fuqi dhe se nafta po kalon përmes Ngushticës së Hormuzit.

“Ne nuk do ta sulmojmë Iranin në asnjë kohë para zgjedhjeve të mesit të mandatit që do të mbahen në Shtetet e Bashkuara më 3 nëntor”, tha Trump.

Shtetet e Bashkuara dhe Izraeli nisën sulme ndaj Iranit në shkurt dhe lufta, dhe kostoja e saj mujore prej 3 miliardë dollarësh – është bërë një çështje kyçe në fushatën zgjedhore të SHBA-së.

Trump ka thënë vazhdimisht se priste që çmimet e naftës të binin ndjeshëm pas zgjedhjeve, por çmimet e larta të gazit dhe lufta me Iranin po i rëndojnë shumë kandidatët republikanë dhe po kërcënojnë shumicën e tyre në Kongres.

Irani dhe SHBA-të kanë shkëmbyer propozime në javët e fundit që synojnë përfundimin e luftës dhe rihapjen e Ngushticës së Hormuzit, një rrugë jetësore globale e transportit të energjisë. Trump e hodhi poshtë ofertën e fundit të Teheranit.