Tensionet në Kuvend, Balla: Urdhrat e dhunës i jep Berisha, nuk do të humbasim më asnjë seancë plenare

Në një deklaratë për mediat jashtë ambienteve të Kuvendit, kryetari i Grupit Parlamentar të Partisë Socialiste, Taulant Balla, ka akuzuar Sali Berishën si personin që jep urdhra për dhunë, duke e lidhur këtë me tensionet në seancën e sotme dhe përplasjet që shoqërojnë protestën.

Balla theksoi se mazhoranca është e vendosur të mos humbasë më asnjë seancë parlamentare dhe do të vijojë me votimin e ligjeve që lidhen me agjendën evropiane, me synimin për të përmbyllur procesin e negociatave me BE-në.

“Besoj e patë se kush i jep urdhrat e dhunës në bulevard. Ajo që patë sot në Kuvend është një shprehje kuptimplotë e faktit se të gjithë urdhrat jepen nga një person dhe ai është Sali Berisha.

Në emër të grupit parlamentar të PS-së, për më shumë se një orë, Kuvendi duhej të votonte një sërë ligjesh. Kishim disa ligje që lidheshin me agjendën tonë evropiane. Ky është arsyetimi dhe përgjigjja ndaj të gjithë atyre që mendojnë se Kuvendi i Shqipërisë nuk do të humbasë asnjë seancë tjetër për vendime të tjera, me përjashtim të votimit të ligjeve që lidhen me rrugën tonë drejt anëtarësimit në BE.

Kalendari ynë përcakton si afat vitin 2027, kur synojmë të përmbyllim procesin e negociatave. Negociatat janë të lidhura me punën që bën Kuvendi.

Shqiptarët kanë votuar më 11 maj 2025 për Edi Ramën si kryeministër. Kontrata e Edi Ramës me shqiptarët është katërvjeçare. Vitin tjetër janë zgjedhjet vendore. Kushdo mund të marrë pjesë në zgjedhje.

Zgjedhjet i cakton Kushtetuta. Partitë nuk mund të përcaktojnë nëse do të mbahen apo jo”, u shpreh Balla.