Test ADN-je për të parë nëse kanë gjetur “shpirtin binjak”

Gjithnjë e më shumë partnerë po i drejtohen testit të ADN-së për të zbuluar se sa është përputhshmëria e tyre gjenetike, ndërsa shkenca po ndihmon në gjetjen e partnerit ideal përmes analizave

Çdo çift pritet të përjetojë vështirësi në një pikë të caktuar dhe mund të jetë e vështirë të dish se personi që ke zgjedhur të kalosh jetën është “i duhuri”.

Për të shtuar shkencë te kjo dilemë, kompanitë e ADN-së po ofrojnë një mënyrë më të lehtë për të kontrolluar nëse keni partnerin/en ideal/e duke krahasuar profilet gjenetike.

Këto teste po përdoren nga çiftet për të kontrolluar nëse e kanë gjetur vërtet “shpirtin binjak” dhe kanë shfaqur përputhshmëri gjenetike me partnerët afatgjatë.

Ka disa mjete që premtojnë të analizojnë përputhjen e dashurisë bazuar mbi gjenet e çiftit, një prej tyre është GenePartner.

Kjo bazohet në një eksperiment të famshëm ku gratë nuhatën bluza të veshura nga burrat për tre ditë dhe më pas vlerësuan perceptimin e tyre për tërheqjen.

Kërkuesit pas këtij testi në Universitetin e Bernës në Zvicër analizuan pjesën e veçantë të ADN-së që lidhet me kodet e molekulës HLA (antigjenin njerëzor leukocit).

Nga kjo gjë ata zbuluan se gratë preferonin bluzat e burrave që kishin molekula HLA sa më të ndryshme nga të tyret. Molekulat HLA prekin përgjigjen e sistemit imunitar, ndaj varieteti sa më i madh i tyre shpesh ofron një mundësi më të madhe të përgjigjeve imune.

Në termat e evolucionit, kjo do të thotë se fëmijët e çifteve me varietet të lartë të gjeneve HLA do të kenë mbrojtje më të mirë nga një shumëllojshmëri sëmundjesh.

GenePartner ofron një pajisje që kushton 250 dollarë, ku çiftet marrin sekrecionet e faqeve të njëri-tjetrit dhe i dorëzojnë ato për t’u analizuar.

Formula e GenePartner pretendon se mat përputhshmërinë gjenetike mes dy individëve dhe bën një parashikim të saktë të fuqisë së bazës së tyre për një lidhje afatgjatë dhe të kënaqshme nga aspekti romantik.

Kjo ndodh duke u siguruar se gjenet HLA janë të ndryshme.

Së fundmi, stacioni televiziv CBS2 në Nju Jork vuri në test një teknikë të matjes së ADN duke e provuar te dy çifte të lumtura. Një test kushton zakonisht 150 dollarë.

Maks dhe Dona Fuechter, që kanë qenë të martuar prej 32 vitesh, e bënë testin dhe doli se ata ishin të përputhshëm nga aspekti gjenetik. “Kjo është me gjasa arsyeja përse kemi qëndruar kaq gjatë bashkë”, tha Dona Feuchter.

Çifti i sapofejuar Chelsea dhe Brian Hudson e bënë gjithashtu një test ADN-je të përputhshmërisë, duke bërë shaka se dasma do të anulohej në rast se rezultatet ishin të padëshirueshme.

Por rezultatet ishin, ashtu sikurse ata kishin shpresuar, se dashuria e tyre do të zgjaste.

Profesori i Universitetit Mançester, Daniel Davis, shkroi për përvojën e tij me gruan Katie në librin “Përputhshmëria e gjenit” që u publikua në vitin 2013.

Ai shpjegoi: “Ne të dy kishim një grup të ngjashëm prej rreth 25,000 gjenesh njerëzore. Disa nga gjenet tona variojnë nga njeriu në njeri, si për shembull ato që na japin tiparet e syve apo ngjyrën e flokëve. Por në librin tim unë përshkruaj gjenet më të veçanta, ato që janë përgjegjëse për përputhshmërinë tonë dhe që variojnë më së shumti mes nesh”.

Gjenet më të rëndësishme variuese janë ato të sistemit imunitar. Ato kontrollojnë mënyrën se si ne përballemi me sëmundjet. Por kërkimet e fundit tregojnë se ato mund të jenë edhe më të rëndësishme nga sa kemi menduar. Ka prova se ato ndikojnë në mënyrën se si truri ynë bën lidhjet, sa tërheqës jemi dhe madje sa gjasa kemi të riprodhohemi.

Për shembull, eksperimentet e fundit tregojnë se gjenet e përputhshmërisë mund të ndikojnë në problemet në shtatzëni. Një test ADN-je i anuluar nga Anthony Nolan Trust – një OJF bamirësie në Britani ndihmon dhuruesit dhe marrësit e transplanteve – zbuloi se gjenet e tij të përputhshmërisë ishin shumë të rralla, ndërsa ato të gruas së tij më të zakonshme.

Një grup i gjeneve të tij gjendeshin më së shumti në Europë, veçanërisht në atë lindore, ndërsa një grup tjetër ishte i pranishëm në Indi apo Australi. Gruaja e tij kishte një gjen që mund të ndihmonte nëse vuante ndonjëherë nga infektimi me HIV.

Ky testim i gjeneve tregon se ndonjëherë është fat i madh kur disa çifte që janë në lidhje afatgjata kanë arritur të gjejnë njëri-tjetrin dhe të ndërtojnë marrëdhënie të qëndrueshme mbi bazën e dashurisë.

Testimi i ADN-së për qëllime dashurie filloi së pari në vitin 1995 me eksperimentin e famshëm të bluzës. Ndërsa sot kërkuesit e dinë se asaj që ne i referohemi si “kimi” mes dy partnerëve, është një kombinim i sistemeve imunitare dhe njohja e ngjashmërisë gjenetike. Sa më të ndryshme gjenet imunitare, aq më të mëdha do të jenë mundësitë e fëmijëve për t’u përballur me sukses me sëmundjet.