Tiranë, dy fëmijë plagosen nga shpërthimi në rrethana misterioze

Një shpërthim për arsye akoma të paqarta ka ndodhur një ditë më parë në breg të lumit afër Institutit Bujqësor të Kamzës, ku kanë mbetur të plagosur dy fëmijë, njëri 17 vjeç dhe tjetri 12, por për fat të mirë janë jashtë rrezikut për jetën.

Sipas një njoftimi për shtyp të Policisë së Tiranës, ditën e djeshme, rreth orës 18:30, në breg të lumit, afër Institutit Buqësor, disa fëmijë kanë ndezur një zjarr duke përdorur mbeturina, ku si pasojë e ndezjes së mbeturinave, është krijuar një shpërthim, i cili ka sjellë plagosjen e A.T., 17 vjeç, banues në Tiranë dhe A. K., 12 vjeç, banues në Tiranë, të cilët ndodhen jashtë rrezikut për jetën.

Në vendin e ngjarjes kanë shkuar shërbimet policore si dhe grupi hetimor ku nga këqyrja e vendit të ngjarjes, rezulton se dy personat e plagosur kanë ndezur disa mbeturina të hedhura në bregun e lumit ku për pasojë ka ndodhur një  shpërthim për shkaqe  ende të paqarta.

“Si pasojë e shpërthimit  janë plagosur lehtë shtetasit A. T. dhe A. K. të cilët morën mjekimin në Spitalin Ushtarak. Grupi hetimor po vijon punën për zbardhjen e ngjarjes”, – përfundon deklarata e Policisë së Tiranës.