Tiranë, shpërthim me tritol në një market

Një shpërthim me lëndë plasëse ka ndodhur në zonën e “Kinostudios” në kryeqytet gjatë orëve të para të mëngjesit të kësaj të hënë, 25 maj. Fatmirësisht, nga ngjarja raportohen vetëm dëme materiale dhe nuk ka persona të lënduar.

“Rreth orës 04:15, në rrugën “Ramazan Gaxheri”, në pjesën e jashtme të një marketi, dyshohet se te motori i kondicionerit, ka shpërthyer një sasi lënde e dyshuar plasëse.Nga shpërthimi janë shkaktuar vetëm dëme materiale. Shërbimet e Policisë dhe grupi hetimor kanë shkuar menjëherë në vendngjarje dhe vijojnë punën për identifikimin dhe kapjen e autorit/ëve, si dhe për dokumentimin e plotë të rrethanave të rastit“, njofton policia.

Gazetari i Klan News, Besar Bajraktaraj  bën me dije se shënjestër e këtij sulmi ka qenë një bar-kafe në këtë zonë. Ngjarja ka ndodhur në ambientet e jashtme të biznesit, pranë derës kryesore.

Nga këqyrja e kamerave të sigurisë rreth zonës, ka rezultuar se autor i kësaj ngjarjeje është një person ende i paidentifikuar, i cili ka qenë i maskuar. Ai është afruar me shpejtësi pranë biznesit, ka lënë një sasi të vogël lënde plasëse pranë derës dhe më pas është larguar menjëherë.

Menjëherë në vendngjarje kanë mbërritur forcat e policisë dhe grupi hetimor për të kryer ekspertizën dhe për të mbledhur provat materiale.

Dyshohet se shkak për këtë sulm me eksploziv janë disa konflikte të mëparshme në të cilat ka qenë i përfshirë pronari i bar-kafesë. Policia po punon për identifikimin dhe kapjen e autorit, si dhe për zbardhjen e plotë të motiveve të ngjarjes.

/tvklan.al