Tjetër aksident me vdekje, humb jetën pasagjeri në aksin Bulqizë-Klos! Plagosen edhe 4 të tjerë

Një aksident i rëndë është regjistruar këtë të diele në aksin rrugor Bulqizë-Klos. Ngjara ka ndodhur në vendin e quajtur “Plani i Bardhë” ku janë përfshirë dy automjete në aksident. Fatkeqësisht nga kjo ngjarje ka humbur jetën pasagjeri i njërit mjet.

Policia njofton gjithashtu se janë plagosur edhe dy shoferët dhe dy pasagjerë të tjerë të cilët ndodhen në spital. Autoritetet po vijojnë hetimet për zbardhjen e plotë të ngjarjes.

“Në aksin rrugor “Bulqizë-Klos”, në vendin e quajtur “Plani i Bardhë”, janë përfshirë në aksident rrugor dy automjete me drejtues shtetasit Xh. S., dhe S. C. Si pasojë, ka humbur jetën shtetasi H. GJ., pasagjer në automjetin që drejtohej nga shtetasit S. C.

Gjithashtu janë transportuar për ndihmë mjekësore në spital, dy drejtuesit e automjeteve dhe dy pasagjerë, të cilat janë në kujdesin e mjekëve. Grupi hetimor po punon për zbardhjen e rrethanave dhe shkakut të aksidentit”, njofton policia.

Këtë të diele është regjistruar edhe një viktimë tjetër për shkak të një aksidenti. Në aksin Korçë-Bilisht humbi jetën një 61-vjeçar. Viktima sapo kishte zbritur nga mjeti kur u përplas për vdekje nga një makinë.