Tjetër dëmtim për francezin, Mbappé në dyshim serioz për “El Clásico” e 10 majit

Kylian Mbappé është në pikëpyetje serioze për “El Clásico” e 10 majit. Sulmuesi francez i Real Madridit iu nënshtrua testeve mjekësore këtë të hënë, pas shqetësimeve që e detyruan të kërkonte zëvendësim në ndeshjen e së premtes ndaj Real Betis.

Diagnoza tregon një “dëmtim në muskulin semitendinoz të këmbës së majtë”. Nuk ka ende një afat të saktë rikuperimi, por klubi madrilen nuk e ka përjashtuar ende për ndeshjen ndaj Barcelonës në “Camp Nou”.

Fillimisht u mendua një mbingarkesë muskulore, por pas 48 orësh u vendos për ekzaminime më të detajuara për të kuptuar shkallën reale të dëmtimit. Mbappé i bashkohet listës së dëmtimeve te Reali, ku janë edhe Éder Militão dhe Arda Güler, duke shtuar shqetësimet përpara ndeshjes më të madhe të sezonit.