Trafikantët përplasin makinat e policisë në Gramsh dhe braktisin 15 emigrantë në Lozhan, në kërkim autorët

Dy automjete “Audi Q7” nuk i’u bindën urdhrit të policisë për të ndaluar, duke përplasur patrullat në postbllok dhe u larguan me shpejtësi. Operacioni u zhvillua mbrëmjen e kaluar në aksin Kapshticë–Lozhan–Gramsh, ku policia dyshon se dy automjetet po përdoreshin për transportin e emigrantëve të paligjshëm.

Sipas raportimve, operacioni nisi në afërsi të Kapshticës, në Devoll, ku forcat e policisë konstatuan dy Audi Q7. Pas ndjekjes, drejtuesit e mjeteve dyshohet se lanë rreth 15 emigrantë në afërsi të Lozhanit dhe vijuan në drejtim të Gramshit.

Në një postbllok në Gramsh, dy automjetet u përplasën me patrullat e policisë, duke rrezikuar edhe punonjësit e shërbimit. Drejtuesit vijuan largimin, ndërsa më pas të dy Audi Q7 u gjetën të braktisur në dy fshatra të Gramshit.

Ndërkohë, 15 emigrantët u gjetën të fshehur në një përrua pranë fshatit Lozhan, ndërsa dy automjetet u sekuestruan.

Policia ka identifikuar dy drejtuesit e mjeteve, të cilët janë shpallur në kërkim, ndërsa një person i tretë është proceduar penalisht në gjendje të lirë.

Operacioni u zhvillua nga Drejtoria e Kufirit dhe Migracionit Korçë, strukturat hetimore të DVP Korçë, në bashkëpunim me Komisariatin e Gramshit dhe Komisariatin nr. 5 të Tiranës.