Tragjedia në Bogdanc, hetimet tregojnë për vrasje dhe vetëvrasje

Shenjat e para të hetimit për dy trupat e gjetur të martën në fshatin Gorno Selo të Bogdancit tregojnë për vrasje dhe vetëvrasje, por të gjitha rrethanat e ngjarjes do të hetohen plotësisht, njoftoi Prokuroria Themelore Publike, siç raporton Makfax. Një prokuror publik nga Gjevgjelia kreu këqyrjen në vendngjarje dhe dha disa urdhra për sigurimin e provave; është urdhëruar autopsia e të dy trupave, ndërsa janë siguruar edhe pamjet e kamerave të sigurisë.

Ngjarja u raportua më 3 nëntor, rreth orës 18:40, kur një banor njoftoi një makinë të djegur të parkuar në vendin e quajtur “Içeva Çeshma”. Pranë makinës u gjet trupi i pajetë i V.G. (21) nga Bogdanci, vdekjen e të cilit e konstatoi ekipi i urgjencës i Spitalit të Përgjithshëm të Gjevgjelisë. Pasi zjarrfikësit lokalizuan zjarrin, brenda makinës u gjet edhe një trup i dytë i djegur, i cili iu dorëzua autopsisë për përcaktimin e identitetit dhe të shkakut të vdekjes, siç njofton MPB-ja në buletinin e saj.

Nga Prokuroria konfirmuan se më 16 tetor ishte paraqitur një raport për rrezikim të sigurisë, sipas të cilit u veprua menjëherë, ndërsa në një procedurë civile ndaj të riut ishin shqiptuar masa mbrojtjeje nga dhuna në familje. Sipas buletinit policor, më 30 shtator, rreth orës 21:00, V.G. e kishte sulmuar fizikisht në shtëpinë e tij të dashurën e tij 17-vjeçare, pas së cilës ishte privuar nga liria dhe për rastin ishte njoftuar prokurori i Gjevgjelisë.

Sipas informacioneve jozyrtare të publikuara nga mediat, trupi i gjetur në makinën e djegur është i 17-vjeçares, por identiteti i saj ende nuk është konfirmuar zyrtarisht. Policia njofton se po merren masa për ndriçimin e plotë të të gjitha rrethanave të tragjedisë.