Raporti i Komisionit Evropian për Maqedoninë e Veriut: përpjekje më të forta për Agjendën e Reformave, por pa ndryshime kushtetuese dhe pa përparim kundër korrupsionit

Maqedonia e Veriut është përfshirë në mënyrë aktive në Planin e ri të Rritjes për Ballkanin Perëndimor dhe i ka forcuar përpjekjet për realizimin e Agjendës së Reformave, thuhet në Raportin e Komisionit Evropian për përparimin e vendit për vitin 2026, i cili prezantohet sot pasdite në Bruksel, siç njofton MIA. Sipas raportit, përpjekjet kanë të bëjnë me katër shtyllat e planit: integrimin gradual në tregun e përbashkët të BE-së, integrimin ekonomik rajonal, reformat thelbësore dhe mbështetjen e shtuar financiare, ndërsa reformat kyçe të lidhura me BE-në duhet të zbatohen.

Siç njofton MIA duke iu referuar raportit, Maqedonia e Veriut e ka ruajtur harmonizimin e plotë me Politikën e Përbashkët të Jashtme dhe të Sigurisë të BE-së, përfshirë edhe qëndrimin për agresionin ushtarak rus kundër Ukrainës, duke dërguar sinjal të fortë për zgjedhjen e saj strategjike drejt BE-së dhe duke u dëshmuar si partnere e besueshme. Vendi ka vazhduar punën për kompletimin e dokumenteve për kriteret e hapjes së Klasterit 1, por nuk është shënuar përparim në miratimin e ndryshimeve kushtetuese të parashikuara në konkluzionet e Këshillit të vitit 2022.

Raporti, siç përcjell MIA, vëren se Komiteti për Stabilizim dhe Asociim u mblodh në prill 2026, për herë të parë që nga viti 2021, dhe se marrëveshjet ekzistuese bilaterale me fqinjët, përfshirë Marrëveshjen e Prespës me Greqinë dhe Traktatin e Miqësisë me Bullgarinë, duhet të zbatohen me vullnet të mirë nga të gjitha palët. Koalicioni qeveritar vlerësohet i qëndrueshëm, ndërsa në administratën publike vendi është mesatarisht i përgatitur, me përparim në shërbimet elektronike.

Në fushën e drejtësisë dhe të drejtave themelore, siç njofton MIA, vendi ka nivel të moderuar përgatitjeje dhe përparimi i përgjithshëm është i kufizuar. Sipas raportit, në parandalimin dhe luftën kundër korrupsionit nuk është shënuar përparim: korrupsioni mbetet i përhapur dhe shqetësim serioz, ndërsa ndryshimet e Kodit Penal të janarit 2026 për veprat e shpërdorimit të detyrës dhe të bashkimit kriminal nuk i adresojnë siç duhet pasojat e dëmshme të ndryshimeve të vitit 2023 dhe kanë kontribuar në pasiguri juridike. Rastet e korrupsionit të nivelit të lartë, thuhet në raport, përballen me vonesa dhe shpesh parashkruhen, duke ushqyer perceptimin e mosndëshkimit.

Pakon e Zgjerimit për vitin 2026, me raportet për dhjetë vendet kandidate, e prezanton sot pasdite në Bruksel komisionerja për Zgjerimin, Marta Kos. Sipas raportimit të Makfax-it, Kos ka theksuar se qëllimi i Komisionit mbetet hapja e klasterit të parë negociues menjëherë pas plotësimit të kushteve dhe se “tani kjo varet nga Maqedonia e Veriut”.