Tregut të punës i shtohen mbi 17 mijë pensionistë

Numri i të punësuarve në moshë pune ra me 32 736 persona në 3-mujorin e parë të vitit 2026 krahasuar me të njëjtën periudhë të një viti më parë, sipas të dhënave të INSTAT.

Të dhënat tregojnë se numri i të punësuarve në grupmoshën 15-29 vjeç u ul me rreth 14.4 mijë persona në raport me 3-mujorin e parë të vitit 2025, ose 8% më pak në terma vjetorë.

Rënie është regjistruar edhe në grupmoshën 30-64 vjeç, ku numri i të punësuarve ishte mbi 18 mijë persona më i ulët se një vit më parë, duke shënuar një tkurrje prej 2.1%.

Ndërkohë, numri i të punësuarve mbi 64 vjeç arriti në 140,713 persona në 3-mujorin e parë të vitit 2026.

Krahasuar me të njëjtën periudhë të vitit 2025, kjo kategori u rrit me rreth 17.7 mijë persona, ose 14.4%.

Pesha e të punësuarve mbi 64 vjeç në totalin e të punësuarve arriti në 12.2% në 3-mujorin e parë të vitit 2026, nga 10.5% në të njëjtën periudhë të vitit 2025.

Të dhënat sipas grupmoshave tregojnë se rënia e punësimit është përqendruar te grupet 15-29 vjeç dhe 30-64 vjeç, ndërsa numri i të punësuarve mbi 64 vjeç ka vijuar të rritet.

---

/tvklan.al