Tryezë e rrumbullakët për ‘Euro modelin’ sot në Podgoricë, e organizon Kabineti i Milatoviqit

Kabineti i presidentit të Malit të Zi, Jakov Milatoviq, organizon sot një tryezë të rrumbullakët kushtuar “Euro modelit”, siç njofton portali Verige, duke cituar njoftimin e Kabinetit të presidentit. Në tryezën, që mbahet në Podgoricë, do të marrin pjesë përfaqësues institucionesh, të komunitetit të ekspertëve dhe të botës akademike.

Qëllimi i tryezës është shkëmbimi i hapur dhe i argumentuar i mendimeve mbi “Euro modelin”, si dhe vlerësimi i aspekteve të mundshme ekonomike, institucionale e të tjera të tij. Ngjarja pritet të hapet me fjalën hyrëse të presidentit Milatoviq, pas së cilës vijon diskutimi i pjesëmarrësve.

Tryeza nis në orën 10:00 dhe zhvillohet në Parkun Shkencor-Teknologjik të Malit të Zi në Podgoricë.

“Euro modeli” është plani i ri ekonomik i qeverisë Spajiq, që parashikon rritjen e pagave – paga minimale deri në 1.400 euro dhe pensioni mesatar 600 euro, sipas planit të njoftuar. Plani ka ngjallur debat publik: punëdhënësit kanë kërkuar zbatim gradual dhe një analizë të plotë të efekteve të tij, ndërsa sindikatat këmbëngulin për qëndrueshmëri dhe zbatim të plotë të rritjes së standardeve të jetesës.