Tuzi pagoi 295 mijë euro për prodhuesit bujqësorë në kuadër të pagesave direkte për prodhimin bimor

Komuna e Tuzit ka paguar 295 mijë euro për prodhuesit bujqësorë, në kuadër të masës së pagesave direkte për prodhimin bimor, siç njofton RTCG-ja. Sipas njoftimit të komunës, këto mjete përbëjnë mbështetje të drejtpërdrejtë për prodhuesit vendas, fermat e tyre dhe përmirësimin e mëtejshëm të prodhimit bujqësor.

Me realizimin e kësaj pagese, vijon zbatimi i Agrobudgjetit të këtij viti, me vlerë të përgjithshme 619 mijë euro, çka konfirmon, sipas komunës, përkushtimin që bujqësia të mbetet ndër prioritetet kryesore zhvillimore të Tuzit.

Në njoftimin e saj, komuna thekson se fokusi është i qartë: prodhim vendas më i fortë, modernizimi i fermave, kushte më të mira pune për prodhuesit dhe konkurrueshmëri më e madhe e produkteve bujqësore vendase. “Dëshirojmë që çdo prodhues që investon mundin, dijen dhe mjetet e veta në punimin e tokës të ketë një partner të besueshëm te Komuna e Tuzit”, thuhet në njoftim.

“Të investosh në bujqësi do të thotë të investosh te prodhuesit, familjet, fshatrat dhe e ardhmja ekonomike e Tuzit”, thekson komuna, e cila premton se do të vazhdojë të zbatojë masa konkrete mbështetjeje dhe të krijojë kushte që bujqësia vendase të rritet, të zhvillohet dhe të mbetet një shtyllë e rëndësishme e ekonomisë vendore.