Vajc i kërkon Kosit angazhim diplomatik për tejkalimin e kontestit mes Shkupit dhe Sofjes

Raportuesi i Parlamentit Evropian për Maqedoninë e Veriut, Tomas Vajc, i bëri thirrje komisioneres evropiane për Zgjerim, Marta Kos, të investojë përpjekje diplomatike për tejkalimin e kontestit mes Shkupit dhe Sofjes, njoftojnë mediat maqedonase, mes tyre Press24 dhe Alfa TV.

Thirrja u bë në seancën e sotme të Komitetit për Punë të Jashtme (AFET) të Parlamentit Evropian, ku komisionerja Kos prezantoi Pakon e Zgjerimit për vitin 2026. Sipas Vajcit, dialogu i drejtpërdrejtë mes dy qeverive është e vetmja mënyrë për dalje nga ngërçi në të cilin ndodhet procesi eurointegrues i vendit.

“Dua të theksoj në kuptimin pozitiv se si Kroacia dhe Mali i Zi i trajtojnë çështjet bilaterale”, tha Vajc, duke e ofruar këtë si model për zgjidhjen e kontesteve bilaterale mes vendeve të rajonit.

Nga ana tjetër, eurodeputetët bullgarë përsëritën qëndrimin se marrëdhëniet e mira fqinjësore janë pjesë e kritereve që vendet kandidate duhet t’i përmbushin, siç njofton portali 48chasa.mk.

Thirrja e Vajcit vjen në ditën kur Komisioni Evropian publikoi raportin e progresit për vitin 2026, në të cilin konstatohet se Maqedonia e Veriut nuk ka shënuar përparim në luftën kundër korrupsionit, ndërsa ndryshimet kushtetuese, kusht për vazhdimin e negociatave të anëtarësimit, ende nuk janë miratuar.