Vdes një person pasi u dërgua në QKUK në gjendje të rëndë shëndetësore, policia nis hetimet

Një person ka vdekur të enjten mbrëma pasi ishte dërguar në gjendje të rëndë shëndetësore në Qendrën Klinike Universitare të Kosovës (QKUK) në Prishtinë, ndërsa Policia e Kosovës ka nisur hetimet për zbardhjen e rrethanave të rastit, siç raporton “Betimi për Drejtësi” duke u mbështetur në raportin 24-orësh të policisë.

Sipas raportit policor, rasti është raportuar më 22 tetor, rreth orës 21:19. Viktima, mashkull kosovar, ishte dërguar në QKUK në gjendje të rëndë shëndetësore dhe më vonë ekipi mjekësor ka konstatuar vdekjen e tij.

Rasti është iniciuar si “Hetim i vdekjes”. Me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion, i cili pritet të përcaktojë shkakun e vdekjes.

Deri më tani, autoritetet nuk kanë bërë të ditur identitetin apo moshën e viktimës, as shkakun e gjendjes së rëndë shëndetësore në të cilën ai ishte dërguar në spital. Policia nuk ka raportuar për persona të dyshuar në lidhje me rastin, ndërsa hetimet vazhdojnë.