Veliaj kundërshtoi arrestin me burg, Kushtetuesja pritet të dalë me vendim

Gjykata Kushtetuese, pritet të dalë këtë të hënë, 25 maj, me një vendim kundër kryebashkiakut të Tiranës, Erion Veliaj, i cili ka kundërshtuar masën e arrestit në burg.

Sipas njoftimit, pritet që vendimi të dalë rreth orës 16:45.

“Sot, në orën 16:45, Kryetarja e Gjykatës Kushtetuese ju fton në një takim informues lidhur me vendimmarrjen për çështjen me kërkues z. Erion Veliaj.

Kërkesa ka për objekt shfuqizimin, si të papajtueshme me Kushtetutën e Republikës së Shqipërisë, të disa vendimeve gjyqësore të dhëna nga Gjykata e Posaçme e Shkallës së Parë për Korrupsionin dhe Krimin e Organizuar, Gjykata e Posaçme e Apelit dhe Kolegji Penal i Gjykatës së Lartë.

Takimi do të zhvillohet në ambientet e Gjykatës Kushtetuese, si zakonisht“, thuhet në njoftim.

Procesi gjyqësor për shqyrtimin e kërkesës së Veliajt u mbajt më 20 maj. Seanca u mbajt me dyer të mbyllura dhe pa praninë e palëve.

Në dhjetëra faqe argumente të dërguara në Gjykatën Kushtetuese, kryebashkiaku Veliaj shprehet se i është cenuar liria individuale, por duke qenë Kryetar i Bashkisë, cenimi i lirisë është i dyfishtë, pasi ai nuk mund të ushtrojë detyrën.

Veliaj ka argumentuar se masa e vendosur ndaj tij nuk është proporcionale, për shkak se ai është një qytetar i zgjedhur sipas Kushtetutës.

Në përditësim të vazhdueshëm deri sa të dalë vendimi i Kushtetueses…

/tvklan.al