Veliaj për shkollat profesionale: Arsim që ofron më shumë punësim

Ministri i Mirëqenies Sociale dhe Rinisë, Erion Veliaj, u bëri thirrje sot prindërve që të hedhin sytë nga arsimi profesional, si një shkollim i përshtatshëm për fëmijët e tyre si mundësi arsimimi, që ofron punësim të sigurtë.
I pranishëm në shkollën e mesme Industriale “Pavarësia” në Vlorë në kuadër të turit që po zhvillon në gjithë shkollat profesionale në Shqipëri, Veliaj tha se “Arsimi profesional është një arsim që ofron punësim. Punëdhënësi më i madh sot është privati, jo shteti. Privati nuk pyet i kujt je apo për cilën parti ke votuar, por pyet çfarë di të bësh me duart e tua”.
Ai vlerësoi mes të tjerave, se shkolla e mesme Industriale “Pavarësia” e Vlorës është një destinacion ideal për çdo prind, që kërkon ta shohë fëmijën e tij të punësuar në fund të procesit arsimor.
Veliaj nënvizoi qëllimin e turit të tij në shkollat profesionale, nisur nga nevoja për të inkurajuar sa më shumë prindër që t’i drejtohen këtij grupimi arsimor për të orientuar fëmijët drejt tyre. Sipas tij, statistikat në botë si dhe në Shqipëri, tregojnë se kush ka arsim profesional është më i punësueshëm dhe më i punësuar se sa një kategori tjetër që ka ndjekur gjimnazin e përgjithshëm ose zotëron një diplomë si ato që janë prodhuar me shumicë në 8 vitet e fundit.
Shkolla e mesme Industriale “Pavarësia” në Vlorë funksionon prej 42 vitesh dhe afron degë si teknologji informacioni dhe komunikimi, elektroteknikë, teknikë ndërtimi, termohidraulikë, mekanikë dhe automobila