VIDEO/ Kapet 45-vjeçari për vjedhjen në Durrës, momenti kur sulmon farmacisten dhe merr paratë

Policia e Durrësit ka arrestuar një 45-vjeçar për vjedhje dhe me precedentë të theksuar për të njëjtën vepër penale.

Mbrëmjen e kaluar 45-vjeçari ka vjedhur me forcë një shumë parash në një farmaci dhe pak orë më pas ai është identifikuar dhe arrestuar nga forcat e policisë së Durrësit. Aktualisht ai me masë sigurie “Arrest në shtëpi”, për vjedhje.

Siç shihet nga pamjet e publikuara nga policia, 45-vjeçari hyn me shpejtësi në farmaci, kap me forcë farmacisten dhe e shtrin në tokë e më pas merr paratë nga sirtari për t’u larguar sërish me shpejtësi.

Policia njoftoi zyrtarisht se si rezultat i administrimit të menjëhershëm të kallëzimit të një shtetaseje, se mbrëmë, në farmacinë ku punonte, në lagjen nr. 12, një shtetas kishte vjedhur me forcë, një shumë parash, shërbimet e Komisariatit të Policisë Durrës finalizuan operacionin e koduar “Reagimi”, gjatë të cilit u kap pak orë pas kryerjes së krimit, dhe u vu në pranga, autori i dyshuar, shtetasi G. Gj., 45 vjeç, banues në Durrës.

45-vjeçari, me precedent kriminal të theksuar në fushën e vjedhjeve, rezultoi se kishte thyer masën e sigurisë “Arrest në shtëpi”, caktuar nga Gjykata, për të njëjtin krim.

Vijojnë hetimet për të zbardhur vjedhje të tjera që mund të ketë kryer shtetasi G. Gj.

Materialet procedurale iu referuan Prokurorisë së Durrësit, për veprime të mëtejshme, për veprat penale “Vjedhja me dhunë” dhe “Largimi i të burgosurit nga vendi i qëndrimit”.