VIDEO / Vidhishta në zi, përcillen në banesën e fundit çifti që u vra nga ish-dhëndri

Fshati Vidhishtë i Roskovecit është në zi pas ngjarjes së rëndë që tronditi komunitetin, ku humbën jetën dy bashkëshortë të familjes Plaka.

Sot në orën 11:00 zhvillohet ceremonia mortore për dy viktimat, ku familjarë, të afërm dhe banorë të zonës do t’u japin lamtumirën e fundit në varrezat e fshatit.

Banorët e Vidhishtës kanë shprehur dhimbjen për humbjen e çiftit, të cilin e përshkruajnë si njerëz të qetë dhe të respektuar në komunitet.

Ndërkohë, ceremonia mortore për autorin e ngjarjes është planifikuar të zhvillohet ditën e diel. Sipas informacioneve, vendimi është marrë për të shmangur përplasje apo tensione të mundshme mes dy familjeve, pasi ato jetojnë në të njëjtën zonë dhe varrezat janë të përbashkëta.

Ngjarja e rëndë u regjistrua në orët e para të mëngjesit të djeshëm, ku 35 vjeç Refit Buzi ka vrarë me armë gjahu ish-vjehrrin e tij, Kosta Plakën, 58 vjeç, si dhe ka plagosur ish-vjehrrën, Belere Plakën, rreth 51 vjeçe e cila ndërroi jetë në spital disa oë më vonë.

Pas krimit autori i dyshuar është larguar nga vendi i ngjarjes me automjet, së bashku me ish-bashkëshorten e tij të cilën e la të lirë, e pas disa orësh autori vrau edhe veten.