Vijojnë punimet për Muzeun e Lundrimit në Shkodrës, Rama: Destinacion i ri kulturor dhe turistik

Në hyrje të qytetit të Shkodrës po vijon ndërtimi i Muzeut të Lundrimit, një projekt që synon të ruajë dhe promovojë historinë e pasur të lundrimit në këtë zonë, duke e shndërruar atë në një pikë të rëndësishme kulturore dhe turistike.

Kryeministri Edi Rama publikoi pamje nga ecuria e punimeve, duke theksuar se muzeu po merr formë si një hapësirë kushtuar trashëgimisë së lundrimit dhe historisë së qytetit.

“Me pamjen e Muzeut të Lundrimit, që po merr formë në hyrje të Shkodrës, si një hapësirë kushtuar historisë dhe trashëgimisë së lundrimit, që do të shndërrohet në një destinacion të ri kulturor e turistik për qytetarët dhe vizitorët, ju uroj një fundjavë të mbarë”, shkroi Rama.

Kompleksi pritet të pasurojë ofertën kulturore të Shkodrës, duke krijuar një atraksion të ri për banorët dhe vizitorët vendas e të huaj. Projekti synon të ndërthurë historinë, kulturën dhe turizmin, duke kontribuar në zhvillimin e mëtejshëm të potencialit turistik të qytetit.