Vjena nuk do të mbështetet te BE për vaksinat
Kancelari i Austrisë, Kurz kritikon autoritetin e medikamenteve të BE, EMA se është shumë i ngadaltë në miratimin e vaksinave të reja. Ai do të bashkëpunojë me Danimarkën dhe Izraelin për vaksinat e reja të Covid-19.
Kancelari i Austrisë Sebastian Kurz nuk dëshiron të mbështetet vetëm te BE për vaksinat e Covid-19 të brezit të ri, të cilat mbrojnë edhe nga mutantët e rinj të virusit. Strategjia e kalimit nëpër BE për prokurimin dhe miratimin e vaksinave ishte “në thelb e drejtë”, shpjegoi Kurz në Vjenë. Por Autoriteti Evropian i Medikamenteve(EMA)është “shumë i ngadaltë” me licensimet dhe kishte “pengesa dorëzimi” të prodhuesve farmaceutikë.
Si përgatitje për mutacione të mëtejshme të mundshme, Austria nuk duhet “të varet vetëm nga BE për prodhimin e vaksinave të brezit të dytë”, tha kreu konservator i qeverisë. Së bashku me kryeministren daneze Mette Fredriksen, ai do të shkojë të enjten në Izrael për të diskutuar prodhimin e përbashkët të dozave të vaksinimit të brezit të dytë dhe bashkëpunimin në hulumtimin e mundësive të mjekimit.
Kurz e bëri të qartë se iniciativa e tij duhet kuptuar në plan afatgjatë. Ai u mbështet në vlerësimet e ekspertëve, sipas të cilave rreth dy të tretat e popullsisë duhet të vaksinohen kundër COVID-19 çdo vit në vitet e ardhshme – dhe këta janë gjashtë milion njerëz në Austri. Fredriksen gjithashtu theksoi se duhet të garantohet që “edhe pas një viti, edhe pas dy vjetësh, tre, pesë dhe dhjetë vjetësh do të kemi doza të mjaftueshme të vaksinës”.
Brukseli kritikohet edhe në Gjermani
Komisioni Evropian po kritikohet edhe në Gjermani, sepse ai është përgjegjës edhe për prokurimin e vaksinave të Covid-19 dhe sasitë aktualisht nuk janë të mjaftueshme. Fushata e vaksinimit në BE po zhvillohet gjithashtu shumë më ngadalë sesa për shembull në Izrael ose Britaninë e Madhe.
Sidoqoftë, Komisioni e minimizoi rëndësinë e iniciativës austro-daneze. “Unë mendoj se gjithmonë ka pasur mbështetje të fortë për strategjinë e vaksinimit, e cila bazohet në bashkëpunimin dhe koordinimin midis shteteve anëtare,” u bë e ditur në Bruksel.
Komisioni ka marrë tashmë iniciativën për të përshpejtuar zhvillimin e vaksinave kundër varianteve të koronavirusit. Për këtë qëllim, duhet të modernizohen edhe procedurat e miratimit të EMA-s.
Presidentja e Shoqatës Austriake të Prodhuesve të Vaksinave, Renée Gallo-Daniel, e mbrojti qasjen e EMA-s. Prioriteti i saj kryesor ishte të kontrollojë sigurinë, efikasitetin dhe cilësinë e vaksinave “, dhe kjo kërkon “kohë “, i tha ajo transmetuesit Ö1. Ajo e përshkroi qasjen e Kurz-it si “inovative”, por në të njëjtën kohë vuri në dukje se mund të duhet
“pesë deri në dhjetë vjet për të ngritur një strukturë të prodhimit të vaksinave”.
Vendet fqinje të Austrisë, Sllovakia, Hungaria dhe Republika Çeke tashmë e kanë braktisur linjën e BE dhe kanë dhënë miratimet e tyre për vaksinat ruse dhe kineze.
