VJENË – IAEA: Centrali bërthamor i Zaporizhias humbet sërish furnizimin me energji

VJENË, 20 gusht /ATSH–DPA/ – Centrali bërthamor i Zaporizhias në Ukrainë, i kontrolluar nga Rusia, ka humbur sërish furnizimin e jashtëm me energji elektrike, njoftoi Agjencia Ndërkombëtare e Energjisë Atomike (IAEA).

Sipas mbikëqyrësit bërthamor të OKB-së, një linjë elektrike me tension 330 kilovolt ka të ngjarë të jetë dëmtuar në bregun verior të lumit Dnipro.

Një përpjekje për ta rilidhur linjën me rrjetin dështoi.

“Për shkak të aktivitetit të vazhdueshëm ushtarak në zonë, teknikët nuk ishin në gjendje të përcaktonin menjëherë shkakun e dëmtimit”, tha IAEA.

Gjeneratorët me naftë u aktivizuan automatikisht dhe nisën të furnizonin sistemet thelbësore të sigurisë së centralit. Ekipi i IAEA-së i vendosur në central po vijonte vlerësimin e situatës.

Drejtori i Përgjithshëm i IAEA-së, Rafael Grossi, paralajmëroi se situata e sigurisë bërthamore është “jashtëzakonisht e brishtë” dhe u bëri thirrje palëve ndërluftuese të tregojnë përmbajtje maksimale dhe të mbrojnë furnizimin e jashtëm me energji të centralit.

Centrali i Zaporizhas, me gjashtë reaktorë, është centrali bërthamor më i madh në Evropë.

Ai ra nën kontrollin rus menjëherë pasi Rusia nisi pushtimin e Ukrainës në shkurt 2022 dhe që atëherë është goditur vazhdimisht.

Reaktorët janë të fikur, por ende kanë nevojë për ftohje, duke e bërë centralin të varur nga linjat e jashtme të energjisë ose nga gjeneratorët me naftë për të garantuar funksionet thelbësore të sigurisë. /Ad.Ab./ a.jor.