“Vjeshta e nxehtë politike”, Berisha: Opozita do përdorë të gjitha mjetet kundër kësaj qeverie

Kreu i Partisë Demokratike, Sali Berisha, paralajmëron një “vjeshtë të nxehtë politike”, duke deklaruar se opozita do të përdorë të gjitha mjetet kundër qeverisë së Edi Ramës.

Gjatë një konference për mediat, Berisha tha se opozita do të vijojë protestat në qytete të ndryshme të vendit, duke pranuar se deri tani ato nuk kanë pasur pjesëmarrjen që, sipas tij, duhet të kenë.

Ai tha se protestat janë të organizuara dhe se pritet të intensifikohen gjatë periudhës në vijim.

“Opozita do përdorë të gjitha mjetet kundër kësaj qeverie. Dhe siç e shihni, rrokullisjen e saj nuk ka forcë në botë që ta ndalë më. Në fakt, në një seri qytetesh, opozita është në protestë. Këto janë të organizuara, por nuk janë masive sa ç’duhet të jenë, por do bëhen. Kështu që, me Edi Ramën çdo ditë, çdo javë që kalon, Shqipëria shkon thellë e më thellë në krizën e saj.

Ndaj dhe e thashë, tani ai e ka të vetin pollin, nuk e ka nga unë. Jo. E dinë vetë ata. Përpara ia bënte pollet Alastair Campbell me ekipet, se vetë Alastairi nuk merret me pollet, po gjente ekipet. Tani duket e ka parë që nuk ia vlen të merret me të dhe ka thënë që është i përfunduar. Ai nuk ka më shpresë, Rama nuk ka më shpresë”, tha Berisha.