VLEN: Partneriteti me SHBA-në dhe zgjerimi i BE-së mbeten kyç për të ardhmen e rajonit

Nga Uashingtoni në Nju Jork, zëvendëskryeministri i parë dhe sekretari i përgjithshëm i VLEN-it, Bekim Sali, mori pjesë në bisedimet për partneritetin me Shtetet e Bashkuara të Amerikës dhe të ardhmen europiane të Maqedonisë së Veriut, thuhet në një deklaratë për shtyp të VLEN-it.

Në Uashington, Sali mori pjesë në diskutimin e Këshillit Atlantik, kushtuar sigurisë, bashkëpunimit me SHBA-në dhe rrugës drejt Bashkimit Europian.

Në Nju Jork, gjatë Javës së Asamblesë së Përgjithshme të Kombeve të Bashkuara, ai mori pjesë në takimin me ministrin e Jashtëm italian, Antonio Tajani, dhe përfaqësues të grupit „Miqtë e Ballkanit Perëndimor“.

Në qendër të bisedimeve ishte perspektiva europiane e rajonit dhe nevoja që zgjerimi i BE-së të mbetet në agjendën politike. Për VLEN-in, Maqedonia e Veriut duhet të jetë e pranishme në bisedimet me partnerët që ndikojnë në të ardhmen e rajonit.

Rruga europiane kërkon reforma në vend dhe angazhim të vazhdueshëm me partnerët ndërkombëtarë, ndërsa Ballkanit Perëndimor i duhen hapa konkretë drejt BE-së. Maqedonia e Veriut duhet ta bëjë pjesën e vet përmes reformave, kurse VLEN-i do të vazhdojë të mbështesë partneritetin me SHBA-në dhe integrimin europian të vendit, theksohet në deklaratë.

Burimi: 24Инфо