Vrasja e drejtorit të United Healthcare, avokatët e Mangione nuk paraqesin ekzaminimet psikiatrike

Ekipi ligjor i Luigi Mangione tha të enjten se nuk do të ndjekin më një mbrojtje psikiatrike në gjyqin e tij të ardhshëm shtetëror për vrasjen e drejtorit ekzekutiv të UnitedHealthcare, Brian Thompson

Një ditë më parë, avokatët e Mangione i thanë gjykatësit Gregory Carro se do të ndiqnin një mbrojtje duke pretenduar se 28-vjeçari po vuante nga një “çrregullim ekstrem emocional” në kohën e vrasjes së Thompson më 4 dhjetor 2024.

Avokatët e Mangiones kishin një afat të fundit të enjten për t’u ofruar prokurorëve informacione në mbështetje të pretendimit për shqetësim emocional.

Në një letër drejtuar Carro-s të enjten, avokatja e Mangione-s, Karen Friedman Agnifilo, tha se mbrojtja “e tërheq me respekt” njoftimin e saj sipas statutit të mbrojtjes psikiatrike të Nju Jorkut.

Mangione është deklaruar i pafajshëm për akuzat shtetërore dhe federale. Gjyqi i tij shtetëror është planifikuar të fillojë më 8 shtator. Gjyqi i tij federal, i cili përfshin akuza për përndjekje, është planifikuar të fillojë më 13 tetor.

Nëse Mangione do të kishte vazhduar me mbrojtjen për shqetësim ekstrem emocional, ai në fakt do të kishte pranuar se e kishte vrarë Thompsonin, por e kishte bërë këtë për shkak të rrethanave lehtësuese. Kjo nuk do ta kishte liruar nga përgjegjësia, por mund ta kishte çuar në më pak kohë në burg.

Nëse një juri pranon mbrojtjen, ajo është e detyruar ta dënojë të pandehurin për vrasje të paqëllimshme, e cila dënohet deri në 25 vjet burg, në vend të vrasjes, e cila mbart një dënim të mundshëm me burgim të përjetshëm.

Thompson, 50 vjeç, u vra ndërsa po ecte drejt një hoteli në Manhattan për konferencën vjetore të investitorëve të UnitedHealth Group. Videoja e kamerave të sigurisë tregoi një person të maskuar që e qëllonte nga pas.

Mangione, një i diplomuar në Ivy League nga një familje e pasur e Maryland, u arrestua pesë ditë më vonë në një McDonald’s në Altoona të Pensilvanisë.

Prokurorët thanë se arma, një pistoletë e printuar në 3D, përputhet me atë të përdorur për të vrarë Thompsonin. Blloku i shënimeve përshkruante dëshirën për të “vrarë” një drejtues të sigurimeve shëndetësore dhe rebelimin kundër “kartelit vdekjeprurës të sigurimeve shëndetësore të nxitur nga lakmia”.