Vucic: Nuk e pyes Presidentin Putin për formimin e Qeverisë time

“Qeverinë e re të Serbisë do ta bëj unë dhe jo Presidenti i Rusisë, Vladimir Putin”, ka thënë Aleksandër Vucic, pasi që kishte zëra që Putin po involvohet në koalicionin e ardhëm qeverisës në Serbi, shkruan Vecernje Novosti, përcjellë Klan Kosova.

 “Ka të tjerë e jo Putin që dëshirojnë të fusin hundët duke propozuar edhe të preferuarit e tyre për ministra, por nuk do të merrem me këto fontana dëshirash”, ka deklaruar Vucic, duke shtuar se ai është i interesuar të dëgjojë qytetarët që e kanë zgjedhur dhe askënd tjetër.

“Ne jemi një vend sovran dhe përbërjen e qeverisë do ta përcaktojë vet”, tha ai.

Këto deklarime Vucic i ka bërë të premten, pas mbledhjes së Kryesisë së Partisë Progresiste Serbe, ku shpjegoi edhe vizitën e tij të paplanifikuar në Moskë.

“Për Presidentin Putin kam respekt të thellë dhe ai nuk po bënë presion mbi mua. Ai është i sjellshëm dhe me mirësjellje edhe kemi biseduar ku nuk është përmendur asnjë parti”, ka thënë Vucic.

“Unë nuk flas me Putinin për çështje partiake, por për bashkëpunimin mes dy vendeve tona, Serbisë e Rusisë”, theksoi ai.