Vuçiç zgjidhet shef i grupit parlamentar të “Serbisë së Bashkuar” në Kuvendin e Serbisë

Bartësi i listës “Serbia e Bashkuar”, Aleksandar Vuçiç, deklaroi sonte se në seancën e grupit parlamentar është zgjedhur shef i grupit parlamentar në Kuvendin e Serbisë, siç njofton Studio B. Ai tha se emri i grupit ende nuk është vendosur përfundimisht — mund të jetë “Serbia e Bashkuar”, “Serbia kundër terrorit” ose ndonjë emër tjetër — dhe se vendimi do të merret të hënën ose të martën në mëngjes.

“Por do të jem atje dhe të paktën për një kohë do të jem shef i grupit parlamentar. Nëse do të mund ta duroj për një kohë më të gjatë apo jo, nuk e di, por në periudhën e parë do të jem shef i grupit parlamentar”, tha Vuçiç për TV Pink, sipas raportimit të Studio B-së.

Sipas tij, grupi parlamentar do të sillet në mënyrë të denjë dhe të civilizuar, do të jetë luftarak dhe do të përfaqësojë interesat e të gjithë qytetarëve të Serbisë. Vuçiç shtoi se grupi nuk do të përfaqësojë vetëm politikën e Partisë Përparimtare Serbe (SNS), por në periudhën e ardhshme do të punojë për krijimin e një fronti të gjerë popullor kundër, siç u shpreh ai, terrorit dhe diktaturës.

Vuçiç njoftoi gjithashtu se grupi i tij parlamentar do ta propozojë Stojan Radenoviçin për kryetar të Kuvendit. “Ata do ta kandidojnë këtë mësuesen e shkollës së mesme, zonjën Shqepanoviç, nëse nuk gaboj, nga Gjimnazi Filologjik, ndërsa ne do ta kandidojmë njeriun që ka më shumë punime shkencore se të gjithë ne 249 së bashku në Kuvendin Popullor. Kur bëhet fjalë për profesionalizëm, tolerancë, durim, Stojan Radenoviçi është padyshim numri një”, tha ai.

I pyetur çfarë pret nga seanca konstituive e Kuvendit më 17 nëntor, Vuçiç tha se pret që përfaqësuesit e Listës Studentore “të bëjnë cirk” duke sjellë njerëz në galeri, gjë që, sipas tij, ata e kanë paralajmëruar. Ai shtoi se nuk pret mundësi marrëveshjeje për vendet e nënkryetarëve, sepse, siç tha, pala tjetër e refuzoi marrëveshjen.