Wadephul në Budvë: E dëgjojmë trokitjen e Malit të Zi në derën e BE-së; Kos: faza finale mbyllet së shpejti

“Mali i Zi po troket në derën e Bashkimit Evropian prej 20 vjetësh, që nga shpallja e pavarësisë — dhe ajo trokitje dëgjohet qartë në Bruksel e në të gjitha kryeqytetet evropiane”, deklaroi të enjten në Budvë shefi i diplomacisë gjermane Johann Wadephul, siç njofton Vijesti. Në konferencën për shtyp të mbajtur në kuadër të konferencës BE–Ballkani Perëndimor, pjesë e Procesit të Berlinit, ai u shoqërua nga komisarja e BE-së për zgjerimin, Marta Kos.

Wadephul theksoi se vendet kandidate të rajonit duhet t’i realizojnë reformat, por edhe vendet anëtare të BE-së duhet të garantojnë që perspektiva e anëtarësimit të mbetet e besueshme. “Nëse tani mungojnë rezultatet pozitive, njerëzit këtu mund ta humbin besimin në procesin e zgjerimit”, tha ai, duke pasur parasysh Malin e Zi — dhe vlerësoi se shanset e vendit janë tani krejtësisht të prekshme.

Ai shtoi, sipas raportimit të Vijesti-t, se zgjerimi i BE-së në Ballkanin Perëndimor është prova kryesore për Evropën dhe vendimtar për sigurinë e kontinentit e për të ardhmen e tij. Vetëm nëse BE-ja u ofron vendeve të rajonit një perspektivë kredibile anëtarësimi dhe i lidh më fort me veten, do ta sigurojë vetes edhe hapësirën e përhershme gjeopolitike të manovrimit, tha Wadephul, i cili edhe para nisjes për në Mal të Zi ishte shprehur për përshpejtimin e zgjerimit për shkak të ambicieve të Rusisë dhe Kinës në rajon.

Nga ana e saj, Marta Kos deklaroi se Mali i Zi “pa asnjë dyshim” është në fazën finale të negociatave të anëtarësimit dhe vlerësoi se kjo fazë mund të mbyllet deri në fund të këtij viti ose në fillim të vitit të ardhshëm, shkruan Vijesti. Pas kësaj, Komisioni Evropian do t’i përcjellë të gjitha dokumentet Këshillit Evropian brenda rreth një muaji e gjysmë. Nëse Këshilli — pra krerët e shteteve dhe qeverive të BE-së — bie dakord, Mali i Zi dhe BE-ja mund të nënshkruajnë traktatin e anëtarësimit, i cili pastaj shkon për ratifikim në të gjitha vendet anëtare. “Sipas përvojave të mëparshme, kjo mund të zgjasë një deri në dy vjet”, shtoi komisarja sllovene, duke vlerësuar se ecuria e negociatave me Malin e Zi ka futur një dinamikë të re në procesin e zgjerimit të BE-së në Ballkanin Perëndimor, pjesë e së cilës është edhe përparimi i fortë reformues i Shqipërisë.